डॉ. सर्वपल्ली राधाकृष्णन (5 सितम्बर 1888 – 17 अप्रैल 1975)

सिरमा-सिरमा 5 सितम्बर रे होन ओड़ो: टीचर को इसु सुकु रसिका ते टीचर कोव: हुलङ् बु मनातिङ् तना। सोबेन कोव: जीनिद् रे गुरु कोव: इनितु रेय: मनारंग ताइनो: गिया। गुरु कोव: इनितु लेकाते गी जीनिद् रे बुगिन असुलेन रेय: होरा नाम दड़ियो: तना।

गुरु कोव: ने हुलङ् चिलका एटे: लेना एना रेय: बरनिका ने लेका मेनागा- अबु भारत दिसुम रेन सिदा उतर उपराष्ट्रपति ओड़ो: डॉ. राजेंद्र प्रसाद तायोम ते बई लेन राष्ट्रपति माइनन डॉ. सर्वपल्ली राधाकृष्णन जनम हुलङ् मनतिंओ: तना, इनि: सिदा मियद् टीचर ताइ केना। 1962 रे इनि: राष्ट्रपति बइजन ची इनिय: चेला को मुसिंग सेन नाम किजा ओड़ो: को मेतई तना चि अम: जनम दिन स्पेशल मनातिङ् ले सनङ् तना। एनते इनि: मेतद्  कोवा चि  एन हुलङ् गुरु को माइन ओड़ो: इनकुव: समाज रे ओम जद् देंगा के मुसिङ् लई उरुम रेय: कामि लगातिंआ। ओड़ो: ने लेकाते गुरु कोव: हुलङ् मनातिङ् एटे: जना।

जोहारदिसुम डॉट कॉम सा-अएते सोबेन गुरु गोमके को इसु माइन जोवार होबाओ:का। 

झारखण्ड लोक सेवा, राँची सा-अए ते एटे: इम्तिहान मेनते प्रेस विज्ञप्ति उड़ुङ्ग केदा। प्रेस विज्ञप्ति लेकाते 19 सितम्बर 2021, एतवार हुलङ् बिनगा-बिनगा जिला टयद् कोरे, सेत: ओड़ो: अयुब् सांज बरसा दुनुब् रे होबाओगा। ओकोय दंगड़ा ओड़ो: दंगड़ी को सयोब् बइन जूलुङ् को पुर: ज़ोर पड़ाव लगातिङ्आ। ओकोय जदि निमिर पड़ाव एटे: जद् रेदो झारखण्ड राइज रेय: पुर: काजी कोरे थिमबा फोकस एम लगातिङ्आ। एनेटे: इम्तिहान रेय: सिलेबस के जनव नेल केयाते पुर: जुलुङ्ग ले रेदो परीक्षा पास रेय: चांस बई दड़ियोगा। नेत: परीक्षा रेय: मुद् काजी को ओड़ो: लिंक को ओमो: तना-

एड्मिट कार्ड 04/09/2021, तिकिन 12.00 बजे ते आयोग रेय: वेबसाइट www.jpsc.gov.in रे डाऊनलोड दड़ियोगा। ने वेबसाइट तेगी सेलेबस कोयो डाऊनलोड दड़ियोगा। सिलेबस मेनते- https://www.jpsc.gov.in/Syllabus.php ते डाउनलोड दड़ियोगा।सिदा होबाकन परीक्षा रेय: सवाल को – https://www.jpsc.gov.in/sam_question_paper.php ते डाउनलोड दड़ीयोगा।

ने दपरदाड़ी परीक्षा रे तेयारी तन सोबेन दंगड़ा-दंगड़ी को सुकु सनङ् जोवार।Press_release_and_instructions_01_21_dated_01_09_2021

15 अगस्त 2021, भारत रेय: 75वीं स्वतंत्रता दिवस रे दिल्ली रेय: अर: किलाए ते संदेश उदुब तन लोओ ते एंगा जागर रेय: बारे रे इसु बुगिन उड़ु: काजी केदा। इनि: मेन केदा चि कम-से-कम सोबेन होनको 5 (मोड़ेया) क्लास सनते एंगा जागर ते इतुन लगातिङ्आ। हुपुड़िङ् होनको एंगा जागर ते इतुन का होबाओ ते पुर: नो: इतुन रे ध्यान काको ओम दड़िया। इंकुव: पेड़े: एट भाषा (जाइसे मुंडा होन को हिन्दी ओड़ो: अंग्रेजी) इतुन रेको फओ जदा।हातु दिसुम कोरेन एंगा-अपु कोयो होन कोव: पड़व ते काको जुड़वेन दड़िया, एनाते इंकुव: सेंड़ा इतुन रे नेया काजी को केनेसेद बाइयो:तना। इनि: आयुरते काजी केदा चि एंगा जागर लो-ओ ते अंग्रेजी ओड़ो: एट: जागर कोयो होन को पड़ावेन का।

इनि नेया काजी नवा इतुन नीति रेय: बरनिका तन लो: ते उदुब जद तइकेना। आबु मुंडा दिसुम रे होनको प्राइमरी क्लास बारी मुंडा तेको पड़ाओ कोरेदो आबु एंगा जागर बंचव रेय: होरा बई दाड़ियोगा। नेयागे आबु नवा इतुन आईन तेबु आसराय तना।

अबु भारत दिसुम पुंडी सयोब कोव: ते आजाद जन रेय: 75 वीं साल (अपि हिसि गेल मोड़ेया साल) रे सोबेन कोके इसु पुर: सुकु सनङ सगुन जोहार!

इसिङ्a

9 अगस्त के गोटा दिसुम रेन आदिवासी को 1492 ईस्वी रे क्रिष्टोफ़र कोलंबस गाअ: ‘खोज’ (दिसुम दंड़ा) लेकन विचार के पहम मेनते अंतर्राष्ट्रीय आदिवासी दिवस गोटा दिसुम रेबु मनातिङ तना।

उपनिवेश (एट: कोव: चेतन रे मोठ्इ ते राइज) रेय: इतिहास नेतअए तेगे एटे: गो: तना, ओकोव: चि यात्रा, विजय प्राप्त करने वाला अभियान, ओड़ो: एमन एट:-एट: नुतुम ते काजी जना। जिताओ, का रेदो धरम होराते दिल के जिताओ ओड़ो: सभ्य-असभ्य, मुख्य धारा, पिछड़ा धारा मेने लेकन हनटिंङ एटे: जना।औपनिवेशीकरण होराते मनोवा होन को ने ओते दिसुम के सिंगी हसूर ओड़ो: सिंगी तुर दिसुम रेको हटिङ केदा। निवेश आधारित औद्योगीकरण ओड़ो: अपन-अपन सिमान पसराओ, अद सिमान बंचओ रेय: दपरदड़ी (प्रतियोगिता), ओड़ो: एपरङ-लड़ई ते ने दिसुम रे बरसा दिसुम लड़ई (World War) होबा जना।

नेया विचार होराते मियद एट: रकम जीनिद जीदेन होरा बई एटे: जना एनारे प्रजा (नागरिक)  को मियद जिनिस लेका को लेका केद कोवा। मगर गोटा ओते दिसुम रेन आदिवासी गोट रेन को एन विचारएते एट: रेको ताइन केटे:याकन तई केना। इनकु मुख्य धारा अद सभ्य समाज काजियो:तन होड़ो: कोव: विचार अकोव: समाज रे काको जमा केदा अद होड़ो होन कोके होड़ो लेका गेको मनातिङ केद कोवा, जिनिस लेका दो का। नेया काजि गोटा ओते दिसुम कोरे बिनगा-बिनगा टायद रे बेरेलाकान आदिवासी कोलो: ते मिद्-मिद् समय रे अद् मिद् लेका गी होबा-ओ तन तईकेना। नेय: रेय: उनुरूम ने लेका बु नेल दड़िया चि ओको इमतङ अमेरिका रे इंडियन रिमुवल एक्ट-1830 (आदिवासी हटाओ कानून) बई केयाते एनत: रेन आदिवासी कोके परका केयाते मिस्सीसिपी ते सिंगी हसूर तेको हर जद्को तइकेना। 1837 सनते 46000 ते थिम्बा अमेरिका रेन पुरखा आदिवासी कोके 2 करोड़ 50 लाख एकड़ बुगिन लोयोंग-पीड़ि, हातु-तुका, ओड़:-दुवर बागे लगिन को मजबूर केद् कोव। इमतुंग 4000 ते ला-अ पुरखा को रेंगे:, तेतङ्, रबङ-रुवा ओड़ो: लगा तेको चबा जना। एन दीपली गे च एन हला-जोला रेगे झारखंड दिसुम रेन आदिवासी को अकोव: ओते-हसा बंचओ नंगेन ब्रिटिश उपनिवेशवादी  कोके विल्किंसन रुल (1837), छोटनागपुर टेनेन्सी एक्ट (1887-1908), संथाल-परगना रेगुलेसन एक्ट (1855-1876, संथाल परगना टेनेन्सी एक्ट 1949) बई मेनते को मजबूर लेद कोवा। ने लेकाते चाहे अमेरिका चय भारत सोबेन तअ: रे आदिवासी को उपनिवेशवादी कोव: पुर: गेको लड़ई केना नेय सबूती नमो: तना।

पुर: मरंग नेपेल रे ने अबु आदिवासी क्षेत्र के पाँचवी अनुसूची ओड़ो: छठवीं अनुसूची रेको बिनगा केदा, नेया बिनगा पुरखा आदिवासी कोव: पुरखा ने लड़ई होराते बइयाकन कानून कोर: लेकाते बई लेना। नेत: रे ताइनो: तन को अकोव: रीति-रिवाज लेकाते जीदेन रेय: च पड़हा-पटी, राज पाट चनालओ मेनते होरा बई लेना, मेनदो नवा लेकाते राज्य, जिला ओड़ो: प्रखण्ड, थाना मेनेलेकन व्यवस्था बई जन ते ने क्षेत्र रेय: होड़ो: लेनेका ओड़ो: पुरखा पड़हा-पटी, माझी-परगना, डोकलो-सोहोर को बगड़ाओ जना। ने लेकाते आबु आदिवासी को दिसुम रेबु गेना हपे जना ओड़ो: अबुवा: प्रकृतिक जिनिस कोबु रे-ए जना।

अपन: जीदेन होरा रेय: उनुरूम (पहचान) बंचव नंगेन आदिवासी  कोव: संघर्ष  रेय: इतिहास इसु जिलिंग-चाकर मेनागा, एनरेयो अबुव: पहचान मड़ी-मड़ी ते चबा इदियो: तना। अबुवा ओते-हसा ओड़ो: बीर-बुरु, दारु-गड़ा, एमन प्राकृतिक संसाधन ओड़ो: अबुव: पुरखौती असुलेन जिनिस कोरे प्रतिकूल प्रभाव टोगो: तना। आबु नंगेन संविधान रे ओलाकन आइन ओड़ो बइयाकन पेसा कानून लेकन कानून को बुगि लेकाते का लागूयो: तना, नेया इसु मरंग उड़ु: रेय: बिसय तनअ।आबु तला रे इसु पुर: मानवशास्त्री को आदिवासी ससंकिर ओड़ो: हसा-भासा रेय: स्टडी को रिका तदा। मेनदो एन स्टडी कोर: इनितु आधुनिक विकास (पश्चिमी विकास मोडल) रेय: ककला रे तोपा गिड़ी जना। अबु आदिवासी कोव: ससंकिर के अविकसित ओड़ो: पुरखा ससंकिर को साकी केदा, ने लेकाते मड़ी-मड़ी ते अबुवा ससंकिर ने समय सयद लई सनते जगा कय नाम दड़ीतना। अबु तला रेयो अबुवा ससंकिर ओड़ो: हसा-भासा रेय: जगर-जपागर का होबाओ तना। अबु के अबु तला रे जगर हपटिंङ रेय: ओड़ो: अबुवा ससंकिर के चिलका ना-अ रेय: उपनिवेशवाद रे कोत: रेबु टिंगु नमेया मेनेय: उड़ु: रेय: दरकार मेनागा।

9 अगस्त रे इकिर मोन ते नेया पहम रुवड़ ओड़ो: उड़ु: रेय: दिन तनअ चि आदिवासी पुरखा को मपरंग-मपरंग उपनिवेश ताकत कोलो: चिलका को लड़ई केना, चिलका हतु दिसुम, ससंकिर, एंगा जगर को बंचव केदा ओड़ो: अबु ना-अ चिलका बु बंचवया। अबुव: मोन ओड़ो: जीनिद के चिलका उपनिवेशवाद-यते बु आजाद दड़िया अद मियद सुगड़ मनोवा समाज, आजाद समाज बु बई दड़िया ओड़ो: बुगिन सम्मानजनक जीनिद बु जीदेन दड़िया।

अबुअ: ओते दिसुम गी अबुअ: जीदन होरा (अवर लैंड इज अवर लाइफ (OLOL)) कैम्पेन

विश्व आदिवासी दिवस रेय: सोबेन को सुकु सनङ लो:ते सगुन जोहार।

सेकड़ा गे मोयोद दपरदड़ी एते गो गा

होन को तेयार बु ताइनका

जोहार

ने वेबसाइट मुंडा ओड़ो: मुंडा भाषा परिवार रेय: सोबेन भाषा को हरा-मता ओड़ो: अदो:वायेते बंचव रेय: मियद जुलूङ तनअ। ने आधुनिक समय रे आबु एंगा जागर सेकड़ा ते अद् इदीयो: तना, एना बंचव ओड़ो: संगोम रुवाड़ा रेय: नेया गे समय तनअ ने समय परोम जन रे इदु आबु एंगा जागर बंचव दाड़ीयोगा ची का एना दो हमबल कगी गे, मेनदो नेया वेबसाइट रे सोबेन संगी ते नेया कमी रिकाय रेय: एनेते: एटेगा कना।

ने वेबसाइट होराते आबू मुंडा जागर ते दिसुम रे होबा तन जे रकम ख़बर को चा अबु कहनी, दुरंग, लिका को ओड़ो: ज्ञान-विज्ञान को पाड़व नाम दाड़ीया. ने वेबसाइट अबु एनगा जागर हरा-मता रेय: मोयोद प्रयास तनअ. जदि अबु हातु- हगा कोरे जाए दुरंग, कहनी कोबु ओल तन रेदो johardisum.mundari@gmail.com रे ओल कुले काबु.

सोबेन को जोहार!