मुरुद एदेल सराईयो बा जन (2)अमअ: इंतजार रे जी ताङ्ञ तड़पव तन(2)
अमअ: इंतजार रे का सातिङओ: तन(2)
3. नवा सांगेन सुड़ा सकमजन (2)
अमअ: इंतजार रे का सातिङओ: तन(2)
अमअ: इंतजार रे बा तङ गोसोतन (2)
करम नेग
सिरमा-सिरमा गेल मिद् भादो लेलो: चंडु: हुलङ् राइज करम बु मनातिङ् ताना। करम परब भारत दिसुम रे बेरेलाकन सोबेन आदिवासी कोबु मनातिङ् तना, एनाते झारखण्ड, छत्तीसगढ़, मध्य-प्रदेश, बिहार,ओडिसा, पश्चिम बंगाल, असम एमन राइज कोरे मनातिङ्ओ: तना। झारखण्ड राइज रे इसु रास-बास ते इसिङ् नेया नेग मनातिङ्ओ: तना। करम रेय: कहनी को बिनगा-बिनगा उदुबो: तना एनाते नेत: कहनी का ओलो: तना मेनदो ने नेग रेय: दर्शन (नेपेल) ने लेका मेनागा- ने ओते दिसुम रे जेतकम गी आदिवासी मनोवा जाति को मेनाकोवा इनकुवअ: नेग दसतुर को इनकुवअ: कामि ओड़ो: प्रकृति लोओ सोतोगन तइना। अबु आदिवासी कोवअ: जिदन खेति-बति ते सेसेन तना, ने कामि रे इसु पुर: पेड़े: एमओ: तना। बाबा कोदे को रोवा सिदा रे सिङ्बोंगा के बुगिन गामा ओड़ो: खेति मेनते बाहा नेग रे अद् हेरो: बोंगा नेग रेबु अरजी लि:ईया। हेरो:, रोवा को छबा जन चि ने करम नेग रे सिङ्बोंगा धईन मेनते ओड़ो: बाबा कोदे को बुगिन गेले जो-ओ: का मेनते बु गोवरि जाईया।
अबुवअ: नेग को अबु जिनिद् अद् असुलेन होरा लोओ: ते संगोमा कन लेका मेनागा। हेरो:, रोवा कामि रे सोबेन अदाकन बु तइना, जी-होड़मो को लगा कन तइना, कुटुम-कुपुल कोलोओ जोवार जागर होका कनोगा। ने समय इसु हमबल ते परोमो: तना, सुरु-सुटु जरगी गामा, हिचिर, रेङगे:, दुकु को परोम केयाते मनोवा को नवा जीनिद् नमाकन लेका जी रेयाड़ा ओड़ो: रसिका रेय: दरकार तइना। करम परब् ने लेका गी जी-होड़मो के बेरेल रुवाड़ाया, कुटुम-कुपुल कोलोओ दुकु-सुकु हपाटिङ्, दुपुलड़ को नपम जपगार रेय: मियद् पुर: गी खास नेग तन-अ। ने सुगड़ नेग रे जोहार दिसुम डॉट कॉम सा-आयते इसु पुर: जोहार।
ओल नि: – दुलारी सुमन ढोडराय, पीएचडी स्कॉलर, राँची युनिवर्सिटी, राँची
आले नानी हातु रे सिंगी डुबुई कोओ: चि पुर: गी कहनी जगर सेसेन तइना। एन अनायुम कहनी मेसे रे मियद् कहनी नेका तईकेना- मियद् हातु रे मियद् कुड़ी होनए तई केनाए। मुसिङ् इनि: हातु जनर गाड़ा ते उमेन ते सेन केना। बुगि लेका उम-नाड़का जन चि गाड़ा गेना मियद् दिरी टुकु रे सितुमेन ते दुब जना। एनत: रेगे दिरी लापंगा रे मियद् कट्कोम ताइनो तन तईकेना। कट्कोम खाने लोड़ो-इया अद् उकु-उकु ते लेला। बुगि लेका सितुम जन चि एन कुड़ी होन ओड़: ते सेनो: जना, मेनदो समड़ोम हिसिर दोय रिड़िङ् तदा, एनते इनि: गाड़ा ते निर केदा। गाड़ा ते तेब: लेन चि इनि: लिज: को मंडव लेद् टायद् को गोटा बियुर ते दंड़ा केदा मगर काय नाम केदा। काय नाम जद् चि इनि: उड़ु: रे ठोओ जना चि एला एङ्गाङ् दो एरङआ, कुली किङ् रे चिनाअङ् मेतइया मेनते रा-अ तना। एन जप: रेन कट्कोम नेया को सोबेन हपे-हपे ते नेल तनय तईकेना।
एनायते मड़ी ते कट्कोम दिरी लापंगायते उड़ुङ् लेना, ओड़ो: दंगड़ी होन के कुलिइ तना- “एला कुड़ी होन अमदो चिका ते नेकम रा-अ तना”?
एनते दंगड़ी होन मेतई तना –“ उमेन मेनते नेत-आङ् हिजु: लेना मेनदो समड़ोम हिसिर नेरे बगी जना, एनाङ् दँड़ा केदा काङ् नाम केदा इदु ओकोय इदी केदा-ए” (मेतई तना हेई)
कट्कोम (दंगड़ी होन के मेतई तना)- एन हिसिर दो ना आङ् लेला कदा।
दंगड़ी होन- कोत: रेम लेला कदा मार उदुबङ् मे (मेतई तना)।
कट्कोम- आइङ्अ काजिम मनातिङ् रेदोङ् उदुबा मेया का रेदो काङ् उदुबा मेया-ए (मेतई तना)।
दंगड़ी होन- हे मार अमअ: काजिङ् मनातिङ्आ, मेनदो आङ्अ हिसिर कोत: रेया एना सेकड़ा उदुबाङ् मे (मेतई तना)।
कट्कोम- आम आङ् लोओम् अड़ंदिन रेदो एना हिसिरेङ् एमा मेया का रेदो का-गे, एना हिसिर दो आङ् गे उकु तदा-ए (मेतई तना)।
कट्कोमाअ: ने काजि अयुम केद् चि दंगड़ी होन ओड़ो: गी पहम नाम किईया। ने कट्कोम लोओ ओकोय ची अड़ंदिना? एंडे रेयो दंगड़ी होन जेतन मुंडी काय नाम जद् चि कट्कोम के हे मार अमअ: काजि गे मेनते काजिया जाय। एनते दो एन कट्कोम आय: ओड़: ते एन दंगड़ी के इदि जा-ईया (इदि लजय)। सेनो: तन सेनो तन चि एन दंगड़ी दो कटा गी का चंडाङ्ओ: तना। एनते कट्कोम दंगड़ी होन के मेतई तना- सेकड़ा सेनेम मड़ी-मड़िम सेना कदा-ए। दंगड़ी होन राअ: तन लोओ कट्कोम के काजि रुवड़ाई तना (दुरङ् बला राग) –
अङ् केदो से-सेनो का सनङ्आ
दिरी रुगड़ी होरा रे
ओकोय गोड़े सेनेया।
ने लेका दुरङ् तन रा-अ: तन लोओ कट्कोमअ: ओड़: किन थेब: जना। दंगड़ी होन दो एन ओड़: तेब जन रेयो रा-अ गी काय होकाया। एनते कट्कोमय मेतई तना रा-अ तन गिम तइना चि मंडी-उतु कोम इसीनेया? (-ए मेतई तना)। एनायते दंगड़ी होन कट्कोम के मेतई तना चि “इसिङ् दो आम गी मार इसीने मे। आङ् दो इसु लगा किदिङ्आ।“ एनायते कट्कोम मंडी इसिन केदा अद् मंडी ज़ोम मेनते दंगड़ी होन हकाव जाई-या। दंगड़ी होन रा-अ दुरङ् तन लोओ ने लेकाय कजियाई तना (बला राग ते)-
अङ् केदो जोजोमो का सनाङ्आ
दिरी-रुगड़ी मंडी के
ओकोय गोड़े जोमेया।
कट्कोम दो मंडी ज़ोम केदा मेनदो एन सुगड़ दंगड़ी होन काय जोजोम जना। एनायते कट्कोम दंगड़ी होन के मेतई तना – मार ना-अ दो गीतिज् कोव: आम दो चिमिनेम राअगा। दंगड़ी होन ओड़ो: गी रा-अ दुरङ् तन लोओ ने लेकाय कजियाई तना (बला राग ते)-
अङ् केदो गीतिजो का सनाङ्आ
टका-टुकु पोटोम रे
ओकोय गोड़े गीतिजा।
कट्कोम दुड़ुम का सातिङ् किज़ चि गितिज ते सेनो: जना अद् मियद् टुकु जप: रे गितिज जना। इनि: लगा कनते दुड़ुम धब् जना। नेते एन दंगड़ी होन दो कट्कोम जप: रेय: दिरी के उदूर तदा। दिरी गुलि जना अद् कट्कोम दो एन दिरी ते थेन गो-ए जना। एनायते एन दंगड़ी होन हिसिर नाम केदा अद् अको ओड़: ते सेनो: जना। ने लेका कहनी टुंडु जना।
पुरखा नुतुम कहनी को हूपड़िङ् रे एयाङ्, goo
नानी तेको कहनी जद् तइकेना एना को मर अपेयो इतुन पे –
(17) गदेद्, (16) जूता, (15) जोजो जो, (14) डाड़ि, (13) चुला, (12) सरजोम जो थब: तन रे जो अद् नाड़ी किन: जगर, (11) सिंजु जो, (10) कंटड़ा, (9) जनता दिरी, (8) पुटकल अड़:, (7) डिबरी, (6) ताला-चाभी, (5) नाड़ी, (4) टोको (बेंगड़ा), (3) बका को, (2) सार, (1) सरजोम जो (ओते रे थव:गो: इमतङ् लिपि-लिपि तन नेलोगा)।
उली को अम्बराय रे
कोयली रूवाड़ा में
जोजो को जुम्बराय रे
बकुली जारूवान में।
बा कोयली सेनेटेर रे
दुरङ होलङ नमाना रे
डलि बकुली तेनेब: रे
डलि होलङ तलाया रे।
दुरङ होलङ दुरंऐया
गति होलङ चिनाविया
सुसुन होलङ तालेया
जुड़ि होलङ उरूमिया।
सामु डोडराय
(सेंड़ा सेतेंग रे चपा लेना)
सामु डोडराय
@राँची
21/08/2011
ओड़अः रचा जोजो सुबा अखड़ा
उली अम्बराय कोरोंजो जुम्बड़ा
अलङ इनुङ केन हुँन्चु ढेलुवा
अलोम रिड़िङएया कन्टड़ा सुबा।
लोयोंग् अड़ि बदि पिड़ि
लेयोन-लेयोन बाबा जिंड़िं
उकु इनुङ केन कोलोम चुपद्
अलोम रिड़िङएया बुसु कुम्बा।
बिर-बुरू गाड़ा-बेड़ा दारू-पुरू बारू-सुड़ा
डड़ि गेना टुक हेस्अ
आलोम रिड़िङएया गाड़ा अँड़िँ।
बुरू लतर सरम रोसोद्
बेड़ा चेतन बगिया बोतोंग
मीरूकिन जगरकेन मुरूद् कोतो
अलोम रिड़िङएया सड़ागी साड़ा।
बिर बितर उरी: गुपि
सड़ागी लतर लिजः नूरा
टुकु चेतन रूतु साड़ी
आलोम रिड़िङएया हातु दिसुम।
सांगिन दिशुम कमि उदम
लंका परोम तइनोः रेयोम
करम रेतम हिजुः रूवाड़ा में
निदा सिंगी अमगेङ नेल होरातन।
-सामु ढोडराय
जोहार दिसुम 