ओड़अः रचा जोजो सुबा अखड़ा
उली अम्बराय कोरोंजो जुम्बड़ा
अलङ इनुङ केन हुँन्चु ढेलुवा
अलोम रिड़िङएया कन्टड़ा सुबा।
लोयोंग् अड़ि बदि पिड़ि
लेयोन-लेयोन बाबा जिंड़िं
उकु इनुङ केन कोलोम चुपद्
अलोम रिड़िङएया बुसु कुम्बा।
बिर-बुरू गाड़ा-बेड़ा दारू-पुरू बारू-सुड़ा
डड़ि गेना टुक हेस्अ
आलोम रिड़िङएया गाड़ा अँड़िँ।
बुरू लतर सरम रोसोद्
बेड़ा चेतन बगिया बोतोंग
मीरूकिन जगरकेन मुरूद् कोतो
अलोम रिड़िङएया सड़ागी साड़ा।
बिर बितर उरी: गुपि
सड़ागी लतर लिजः नूरा
टुकु चेतन रूतु साड़ी
आलोम रिड़िङएया हातु दिसुम।
सांगिन दिशुम कमि उदम
लंका परोम तइनोः रेयोम
करम रेतम हिजुः रूवाड़ा में
निदा सिंगी अमगेङ नेल होरातन।
-सामु ढोडराय
जोहार दिसुम 