कैलिफोर्निया बिर सेंगेल, सीसीटीवी न्यूज़
मियद् पुरना दुरङ ने लेका जरगा /मागे राग रेको दुरङ जदा:
बिर-दो-बिर-दो लो तना
बई ज़ोम मेया चुटू होन रुसा तुका-2
नई-दो-नई-दो नांजेद् तना
बई ज़ोम मेया कड़ाकोम दिरी कपेटा-2
सेनो: जन महीना रे गोटा ओते दिसुम रे होयो, गामा, जेटे-लोलो, बिर सेंगेल ओड़ो: बाइडि ते मनोवा होन ओड़ो: बिर जन्तु कोव: जीनिद् आलय-बालय लेना। वैज्ञानिक कोव: काजि लेकाते नेया रे मनोवा होन को रिका कद् होयो- दा-अ ओवल रेय: कारन ते होबा-ओ: तना। हिजु: तन समय रे नेलकन घटना को पोसा इदियो: रेय: बोरो मेनागा। पुरखा कोव: दुरङ काजी सनरती रे दिसुम होड़ो को नेल जदा।
कनाडा रे हातु को लो जना
चीन रेय: जंगजाऊ सहर रे 19 जुलाई 2021 रे मुसिंग रेगी 624 मिलीमीटर गामा उयु: जना जो ची साल भइर रेय: गामा बराबाइर मेनागा। गोटा सहर रे बाइडि दा-अ पेरे: जना, एन कारन ते बर (2) लाख होड़ो कोके ओड़:एते एट: टायद् ते इदी होबा जना ओड़ो: 33 (हिसि गेल अपि) लेका होड़ो बंको जना।
चीन रेय: घटनायते मिद् हब्ता सिदा, सिंगी हसुर जर्मनी दिसुम (पश्चिमी जर्मनी) रे बाइडि ते मपरंग सहर को डुबा लेना ओड़ो: 177 होड़ो को छबा जना अद् मिद् सै (मोड़े हिसि) ते पुर: को ला-पता जना। नेया बाइडि बेल्जियम दिसुम रेयो तेब: लेना अद् एन्त: रे 37 होड़ो को छबा जन रेय: खबर नाम लेना।
इसु दिनएते अमेरिका (कैलिफोर्निया), अल्जेरिया, ग्रीस, तुर्की, साइप्रस, कनाडा रेय: बिर को धद्कओ तना। ने बिर सेंगेल ते चिमिन होड़ो को अकोव: ओड़: बागी होबा केद् कोवा। कनाडा रे सिरमा सितुम ते बिर सेंगेल जुल जना अद् हातु को बिर सेंगेल ते जुल जना।
Uttarakhand_landslide ANI photo
आबु भारत रेय: उतराखंड रे दा-अ रिमिल रापुद जना (इसु पुर: गामा हिजु जना) अद् अपि दिन निदा-सिंगी दा-अ केदा, चिमिन होड़ो बुरु हंदड़ू जन तेको तोपा गो-ए जना। ने लेकन घटना को पोसा इदि तना। आबु झारखंड ओड़ो: छत्तीसगढ़, उड़ीसा राइज़ रेय: बिर-बुरु कोयो जेटे सिंगी जुलतन नेलो: तना। नेया कारन ते आबु दिसुम रेयो लोलो पोसा तना।
गोटा दिसुम रे इसु पुर: मपरंग करखाना ओड़ो: मपरंग सहर को बई मेनते इसु पुर: बिर को उटुंड़ जना, करखाना रेय: सुकुल ओड़ो: गंदा दा-अ, संडका रे सेसेन तन मोटोर सुकुल, दुदुगर ते होयो, दा-अ, ओते सोबेन ओवल तना।
वैज्ञानिक को सिदाएतेगे नेया को ओनमान जदा अद् दिसुम रेन नेता ओड़ो: होड़ो कोके को चिरगल जद कोवा चि दिसुम रे होयो- दा-अ ओवल जन रे कोत: पुर: गामा होबाओगा, ओकोरे जेटे ते अकाल हिजुगा, बिर सेंगेल को जुलोगा, बंदा, नई को अंजेदोगा, समुदर रेय: दा-अ पोसाओगा ने लेकाते समुदर गेना सहर ओड़ो: हातु को समुदर रे डुबुई:योगा। ओते एकला (भूकंप) ओड़ो ज्वालामुखी रेय: घटना कोयो पोसाओगा।
ईरान दिसुम रेदो दा-अ का नमो: तना, गामा का होबा जन ते खेती को का होबा दाड़ी जना। दा-अ मेनते एनत: रेन होड़ो को ओड़ो: पुलिस कोलो: लपड़ई होबा जना, मियद पुलिस ओड़ो: उपुनिया होड़ो को गोए जना। अफ्रीका रेय: दिसुम को मपरंग गाड़ा दा-अ कोते खेती कोको रिका आउ जादा, जदि गाड़ा को अन्जेद जन रे एन दिसुम को ताला रे एपरंग ओड़ो लड़ाई होबओगा, आबु भारत रेयो: बिंगा-बिंगा राइज़ को ना-अएते गे नई कोर: दा-अ मेनते को लड़ाई तना। हिजु:तन समय रे गाड़ा को अनजेद जन रे नेया लड़ाई पोसाओ: रेय: बोरो मेनागा।
Observed temperature from NASA versus the 1850–1900 average as a pre-industrial baseline. Source: Wikipedia
वैज्ञानिक ओड़ो: सेंड़ान होड़ो को ने लेकन ओनमान ओड़ो: घटना कोते पुर: गे उड़ु: रे मेना कोवा। एना लगिन सोबेन दिसुम रेन अगुवा कोके ने सोंकोटोएते बंचव मेनते सेकड़ा-ते-सेकड़ा कटा चंडाङ रेय: सलइ को ओमाकोतना। यूनाइटेड नेशन्स रेय: यूएनडीपी (यूनाइटेड नेशन्स डेव्लपमेंट प्रोग्राम) रेय: गोल नंबर 13 रे क्लाइमेट एक्शन को बाइया कदा। नेय: रेय: होराते 2050 ईस्वी रे कारख़ाना क्रांति समय तइकेन ओते लोलोएते ला-अ 1.50 डिग्री सेल्सियस रे कोटोङ रेय: टारगेट को जोगाव कदा। नेया टारगेट नाम मेनते सोबेन दिसुम जोटो: कोवा:एते जुलूङते कामी रेय: दरकार मेनागा। ओते लोलो इमनुङ रे का कोटोङ जन रे मनोवा होन ओड़ो: जीव-जन्तु, दारु को ने ओते दिसुम रे ताइनो: इसु मसकिल होबाओगा।
अबु भारत ओड़ो: गोटा ओते दिसुम रेन आदिवासी को नेया बु इतुवन तना चि होयो दा-अ को ओवल जन रे रकम दुकु को दिसुम रे हिजुगा। नेया काजी ने समय वैज्ञानिक कोयो को मनातिङ् तना, मेनदो ने समय मनोवा को प्रकृति एंगायते निमिन सांगिन को सेनो: कना चि सेकड़ा आदिवासी कोव: होरा रे हिजु: हमबल गिया। ने प्रकृति ओड़ो: होयो दा-अ, दारु-सिङ् को बुगिन ताइनो:का मेनते ओड़ो: बिर-बुरु, गाड़ा को बंचव लगिन जानव-जानव बु लड़ाई तना मेनदो आबु रेयो ने समय बानता बनो: जना, सोबेनको अपन-अपन असुलेन रेबु अदा कना। आबु के कम-से कम आबु दिसुम बंचव मेनते सोबेन मिमियद होड़ो कोके ओते हसा, बिर, ओड़ो: नई गाड़ा को, बंचव रेय: जूलुङ् कमी होबाओगा।
सोर्स :-
- बीबीसी हिन्दी
- The Guardian
- DW.com
- http://www.org
जोहार दिसुम 